Батыс Қазақстанда дәрі-дәрмек тиелген «ГАЗель» автокөлігі жанып кетті

ОРАЛ. ҚазАқпарат – Батыс Қазақстан облысында трассада дәрі-дәрмек тиелген «ГАЗель» автокөлігі жанып кетті, деп хабарлайды ҚазАқпарат тілшісі.

БҚО ТЖ департаментінің баспасөз қызметі мәлім еткеніндей, оқиға 16 қараша күні сағат 23.49-да Орал-Атырау жолы бойында, Ақжайық ауданы Самал елді мекені тұсында болды.

«Муратова» жеке кәсіпкерлігіне тиесілі, 21 жасар жүргізуші айдап келе жатқан «ГАЗель» автокөлігі отқа оранды.

Өрт сағат 00.45-те оқшауланып, 01.15-те сөндірілді. Зардап шеккендер жоқ.

БҚО полиция департаментінің баспасөз қызметі оқиғаның Орал-Атырау жолының 105- шақырымында болғанын жеткізді.

Оқиға орнында полиция қызметкерлері де жұмыс істеді.

Еске сала кетейік, бұдан бұрын Оралда жол апатынан бес адамның зардап шеккенін жазған болатынбыз.