ОРАЛ. Қыркүйектің 11-і. ҚазАқпарат /Ғайсағали Ералы/ - Батыс Қазақстан облысында доңыз тұмауына қарсы тиісті шаралар жасалуда.
Орал қаласының бас мемлекеттік санитарлық дәрігері Мұхамед Арыспаевтың ҚазАқпарат тілшісіне хабарлағанындай, осы дерттің алдын алу үшін облыстық, қалалық штабтар құрылып, жұмыс жасауда. Теміржол вокзалы мен әуежайда, сондай-ақ көршілес Ресей облыстарымен шектесетін аудандарда барлығы тоғыз санитарлық-карантин бекеті бар. Пойыздар мен ұшақтар, автобустар үнемі бақылауда. Егер қызулап келе жатқан адамдар ұшырасса, дереу анализ алынып, алдымен осындағы вирусологиялық зертханадан, содан кейін Алматыда тексеруден өткізіледі. Доңыз тұмауына шалдыққан адам түсе қалған жағдайда оны оқшаулап емдейтін орындар да дайын. Әзірге мұндай оқиға кездескен жоқ.
Алдағы қазан айынан бастап күз, қыс кезінде күшейетін «үйреншікті» тұмаудың да алдын алуға арналған шаралар жүргізіледі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).