ОРАЛ. 31 мамыр. ҚазАқпарат - Батыс Қазақстан облысында Халықаралық балаларды қорғау күніне орай шаралар ұйымдастырылуда.
31 мамыр күні Оралдағы облыстық балалар үйінде мерекелік шара өткізілді. Бүлдіршіндерді құттықтауға облыстық балалар құқығын қорғау департаменті, қоғамдық бірлестіктер, мекеме-ұйымдар өкілдері келді. Мейрам кезінде демеушілердің рөлі аталып өтілді. Мәселен, «Жайықмұнай» ЖШС балалар үйін абаттандыруды қолға алса, «Үміт» Орал өңірі әйелдері одағы» қоғамдық бірлестігі балаларды қоғамдық өмірге бейімдеу үшін түрлі шаралар өткізуде. Бұл жолы да меймандар балаларды мейрамымен құттықтап, сыйлықтарын үлестірді.
Балалар үйінің директоры Раиса Наурызованың айтуынша, балдырғандар үшін мұндай шаралардың маңызы зор. Олар өздері де концерт қойып, бір серпіліп қалады.
1 маусым күні облыстық балалар үйінің тәрбиеленушілері жергілікті зообақта, «Орал» сауда ойын-сауық орталығында болып, қызық көреді, сондай-ақ «Сарыарқа» кафесінен тамақтанады.
Осындай шаралар облыс аудандарында да өткізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).