ОРАЛ. ҚазАқпарат - Батыс Қазақстан облысында көктайғаққа байланысты бірнеше автожол жабылды, деп хабарлайды ҚазАқпарат тілшісі.
"Қазгидромет" РМК БҚО филиалының мәліметі бойынша 13-14 желтоқсан күндері өңірде күн жауын-шашынды болып, тұман түсіп, қатты көктайғақ болады деп күтілуде.
БҚО Төтенше жағдайлар департаментінен түскен мәліметке қарағанда, трассалар сағат 19.00-ден бастап жабылған.
Атап айтқанда, облыстық маңызы бар Чапаев-Жаңақала-Сайқын бағытында барлық көлік түрінің қозғалысына шектеу қойылды.
Сол секілді республикалық маңызы бар Орал-Атырау, Чапаев-Жалпақтал-Қазталов-Жәнібек жолдары да жабылды.
«Қазіргі кезде жолдардың жабылғаны жөнінде тұрғындарға ескертілуде», - деп хабарлады ТЖ департаментінен.
Еске сала кетейік, бұдан бұрын облыста көктайғаққа байланысты жолдардың жабылғанын, сондай-ақ Оралда жарақат алғандардың саны 200-ден асқанын жазған болатынбыз. Ауа райының бұзылуынан жол-көлік оқиғалары да жиілеп отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).