Батыс Қазақстанда көліктерге жаңа үлгідегі мемлекеттік нөмірлер беріле бастады
БҚО ІІД жол полициясы басқармасы тіркеу, емтихан алу бөлімінің бастығы, полиция подполковнигі Жанболат Жаншиннің айтуынша, қазірдің өзінде 800-ден астам көлік жаңа нөмірге ие болып үлгерді.
Бұрын автокөліктерді қай аймақтікі екенін бірінші әрпіне қарап ажырататын болса, енді цифрдан-ақ білуге болады. БҚО-ның еншісіне қасиетті «7» саны тиген. Мемлекеттік туымыз бен «KZ» жазуынан кейін үш цифр, одан кейін жекеменшік көліктерде үш, мекеме автоларында екі әріп орналасқан. Бәрі халықаралық талаптарға сай. Бірақ ескі нөмірлер міндетті түрде жаңасына ауыстырылуы тиіс деген талап қойылмайды. Жаңа тіркеу нөмірі жоспарлы түрде және біртіндеп әркім көлігін жаңадан немесе қайтадан тіркеткенде берілуде. Жаңа нөмір үшін мемлекеттік баж салығының көлемі Салық кодексімен бекітілген.