Батыс Қазақстанда күшті жел мектептің шатырын жұлып әкетті
21:01, 14 Қаңтар 2021
ОРАЛ. Батыс Қазақстан облысында күшті жел мектептің шатырын жұлып әкетті, деп хабарлайды ҚазАқпарат тілшісі.
БҚО ТЖ департаментінің баспасөз қызметінен түскен мәліметке қарағанда, оқиға 14 қаңтар күні сағат 14.40-та Қаратөбе ауданы Жусандыой ауылында болды.
Екпіні секундына 22 метрге дейін жеткен қатты жел салдарынан орта мектеп ғимаратының шатыры сыпырылып түсті. Оның аумағы 1266,8 шаршы метрді қамтыды.
Ғимараттың жалпы ауданы - 1778 шаршы метр.
Зардап шеккендер жоқ.
Оқиға орнында арнайы комиссия жұмыс істеуде.
Еске сала кетейік, бұдан бұрын Батыс Қазақстанда республикалық жол жабылғанын жазған болатынбыз.