ОРАЛ. Қазанның 18-і. ҚазАқпарат /Елжан Ералы/ - БҚО бойынша экономикалық қылмысқа және сыбайлас жемқорлыққа қарсы күрес департаменті қызметкерлері жедел-іздестіру шаралары барысында бір мемлекеттік мекеме бастығының конкурстық комиссия төрағасымен және ЖШС құрылтайшысымен алдын ала қылмыстық ымыраласуға келіп, БҚО ауылдарының біріндегі сумен жабдықтау нысанын мемлекеттік сатып алу бойынша конкурстың жеңімпазы ретінде аталған серіктестікті заңсыз тану жолымен ірі мөлшердегі бюджеттік қаражатты талан-таражға салғаны анықталды.
ЖШС құрылтайшысы мемлекеттік мекеме бастығының келісімі бойынша, конкурстың басқа қатысушылары алдында артықшылық алу мақсатында конкурстық өтінімде ЖШС қызметкерлерінің санын негізсіз асырып көрсеткен. Сөйтіп серіктестікте кәсіптік біліктілік деңгейі бар 207 қызметкер жұмыс жасайтыны жөнінде мамандардың жалған тізімін берген, іс жүзінде олардың саны 45 қана болған. Бұл ЖШС-ні жеңімпаз деп тану және баға ұсыныстары төмен басқа қатысушылардың конкурстық өтінімдерін қабыл алмау үшін негіз болып табылған. Соның салдарынан аталған тұлғалардың заңсыз іс-әрекеттерінің нәтижесінде мемлекетке 7,5 млн. теңгеден астам шығын келтірілген.
Аталған факті бойынша мекеме бастығы, конкурстық комиссияның төрағасы және ЖШС құрылтайшысына қатысты ҚР ҚК 176-бабы 3-бөлімі «б», «г» тармақтары (сеніп тапсырылған өзгенің мүлкін иемдену немесе рәсуалау) бойынша қылмыстық іс қозғалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).