ОРАЛ. ҚазАқпарат – Батыс Қазақстан облысында мал қорасы мен 125 тонна пішен жанып кетті, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткеніндей, оқиға 28 мамыр күні сағат 20.20-да Тасқала ауданы Мереке ауылдық округі Қалмақ қыстағында «Мерлан» шаруа қожалығының аумағында болды.
Найзағай түсіп, аумағы 770 шаршы метр мал тұратын базаның шатыры мен соған жапсарлас үйілген 125 тонна (700 шаршы метр, 500 орама) пішен өртенді. Оған қоса қора ішіндегі 3 тонна арпа отқа оранды.
«Тілсіз жауды» ауыздықтауға ТЖ департаментінен 7 қызметкер, 2 техника, ерікті өрт сөндіру құрылымдарынан 12 адам, 4 техника жұмылдырылды.
Өрт бүгін сағат 04.47-де толықтай сөндірілді. Зардап шеккендер жоқ.
Еске сала кетейік, бұдан бұрын Оралда 3 жасар баланың төртінші қабаттан құлап кеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).