ОРАЛ. 23 наурыз. ҚазАқпарат - Батыс Қазақстан облысында су тасқынына қарсы шараларға 300 адам, 78 техника, 33 мотопомпа, 5 қайық қатыстырылуда.
Облыстық төтенше жағдайлар департаментінің баспасөз қызметінен 22 наурыз күні түскен мәліметке қарағанда, соның ішінде ТЖ департаменті бөлімшелерінен 96 адам, 24 техника, 15 мотопомпа, 5 қайық шығарылған. Облыста тәулік ішінде 6944 текше метр су сорылып алынды.
Орал қаласына қарасты «Сарытау» шағынауданында 21 наурыз күні кешке қарай С.Айтқұлов көшесіндегі үйлерге су кіру қаупі төнді. Орал-Сарытау күре жолына қарай шығатын жолды жырып жіберуге тура келді. 10 үйдің жанына 500 қап төселді. Оралда барлығы 2 мың қап төселіп, үш жерден жол жырылды.
Ақсай қаласы мен Бөрлі ауылында 10 жерде, сондай-ақ Зеленов ауданы Достық, Красноармейск, Мичурин, Теректінің Подстепный, Магистральный, Тоқпай ауылдарында су сору жұмыстары жүргізілуде. Подстепныйда 5 үйдің ауласына су кірген. Мұнда арықпен су жіберу, жолды жыру жұмыстары жасалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).