ОРАЛ. ҚазАқпарат - «Қазгидромет» РМК БҚО филиалының мәліметіне қарағанда, 24 ақпан күні облыстың кей жерлерінде жауын-шашынды болып, тұман түсіп, көктайғаққа ұласады. Оған қоса оңтүстік-батыстан соғатын желдің жылдамдығы секундына 15-20 метрге дейін жетеді, деп хабарлайды «ҚазАқпарат» ХАА тілшісі.
Орал қаласында да күн жауын-шашынды болып, желдің жылдамдығы секундына 18 метрге дейін күшеймек.
Осыған орай БҚО ТЖ департаменті тұрғындар арасында төтенше жағдайларды болдырмау, өмірлік маңызы зор нысандардың іркіліссіз жұмысын қамтамасыз ету мақсатында ескерту жариялады.
Еске сала кетейік, бұдан бұрын 2-3, 5, 15-16 және 19-21 ақпан күндері желдің күшейіп, бұрқасын көтерілетіні жөнінде ескерту жарияланған болатын.
Соңғы күндері Батыс Қазақстанда ауа райы құбылмалы болып тұр. Еріген қар суы қайта қатып, мұзға айналуда. Сондықтан, әсіресе, жолдарда абайлап жүрмесе болмайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).