ОРАЛ. ҚазАқпарат - Батыс Қазақстан облысында үшем дүниеге келді, деп хабарлайды ҚазАқпарат тілшісі.
Орал қаласындағы облыстық перинаталдық орталықта Ақмарал Жұмазова 30 маусым күні үш қыз тапты.
Үшемнің әкесі, Жәнібек ауданы Жәнібек ауылында тұратын Елдос Сағадетовтің айтуынша, олардың бұдан бұрын бір ұл, бір қызы бар екен.
Енді, міне, Ақмарал екеуі бес баланың ата-анасы болып шыға келді.
Қазіргі кезде Ақмарал мен қыздары дәрігерлердің бақылауында. Әмина, Рәмина, Мәдина атанған сәбилердің салмағы 2600, 2400 және 1900 грамм.
«Өмірге сәби әкелу оңай емес. Әйтеуір бәрі ойдағыдай болғанына қуаныштымыз. Енді балаларымыз аман-есен өсіп кетсе, біз үшін сол бақыт», деді Елдос Базарбайұлы.
Елдос аудандық мектептен тыс жұмыстар орталығында ұстаздық етумен бірге қолөнермен де айналысады. Астау, бесік, домбыра жасаудың хас шебері.
Ақмарал Талғатқызы 1-мектеп-лицейде физика пәнінен дәріс береді.
Жәнібектік тұрғындардың сөзіне қарағанда, бұл - аудан бойынша алғашқы үшем.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).