ОРАЛ. ҚазАқпарат – Батыс Қазақстан облысында жаңбыр мен көктайғаққа байланысты жол жабылды, деп хабарлайды ҚазАқпарат тілшісі.
«Қазақавтожол» ЖШС БҚО филиалының мәліметіне қарағанда, ауа райының нашарлауына байланысты (көктайғақ, жаңбыр) республикалық маңызы бар Самара-Шымкент жолында (394-526 км, Жымпиты – Ақтөбе облысының шекарасы) барлық көлік түрлері үшін қозғалысқа шектеу қойылды.
Аталмыш бағытта жол 27 желтоқсан күнгі сағат 05.00-ден бастап жабылды.
Осыған байланысты БҚО ТЖ департаменті ескерту жариялап, тұрғындарға СМС хабарламалар жіберді.
Сонымен қатар облыстық маңызы бар «Бөрлі-Ақсай-Жымпиты», «Ақсай-Шыңғырлау», «Шыңғырлау-Ақшат-Сегізсай», «Федоров-Ақсай» жолдары да жабылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).