ОРАЛ. ҚазАқпарат - Ірі мал шаруашылығы кешендерін құнарлы азықпен қамтамасыз ету мақсатында Батыс Қазақстан облысында құны 5619,5 млн. теңге тұратын, жалпы алаңы 108,9 мың га он бірдей су жайылмалары жүйесін қайта құру көзделуде.
Соның ішінде 131,3 млн. теңге ЖСҚ жасауға, 5488,2 млн. теңге жобаны жүзеге асыруға кетпек.
Облыс әкімдігінен түскен мәліметке қарағанда, мұны Қазақстанның су ресурстарын басқару мемлекеттік бағдарламасына енгізу үшін ҚР Қоршаған ортаны қорғау және су ресурстары министрлігіне ұсыныс жасалды. Сондай-ақ аталмыш бағдарламаға 17816,7 млн. теңгеге (747,7 млн. теңгесі ЖСҚ-ға) республикалық маңызы бар 24 су шаруашылығы нысанын қалпына келтіруді енгізу ойластырылуда.
Биыл сметалық құны 854,9 млн. теңге тұратын Жайық-Көшім жүйесінен Киров-Шежін арнасы арқылы Қазталов ауданы Ақпәтер ауылы тұсында Қараөзенге су жіберу жобасының екінші кезеңі жүзеге асырылмақ. Бұл 180 мың га табиғи шабындықтарды қосымша суландыруға және 15 мыңдай адам тұратын елді мекендерді шаруашылыққа пайдаланатын сумен қамтуға мүмкіндік береді. Екінші кезең барысында ұзындығы 75 км арна тазартылып, 16 тоған, 28 гидротехникалық құрылым қайта құрылмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).