ОРАЛ. ҚазАқпарат – Батыс Қазақстан облысында жол апатынан төрт адам қаза тапты, деп хабарлайды ҚазАқпарат тілшісі.
БҚО полиция департаменті баспасөз қызметінің жетекші маманы Мөлдір Садырғалиеваның мәлім еткеніндей, оқиға 1 шілде күні сағат 21.00-де Жаңақала ауданы аумағында болды.
Чапаев-Жаңақала-Сайқын жолында Жолқұдық елді мекені тұсында 1987 жылғы жүргізуші «Лада Гранта» автокөлігімен қарсы бетке шығып кеткен. Соның салдарынан 1993 жылғы жүргізуші айдап келе жатқан «ВАЗ-2107» автокөлігімен бетпе-бет соқтығысқан.
Жол апатынан 4 адам қаза тапты, соның біреуі – 7 жасар бала.
Жаңақала аудандық орталық ауруханасына 8 адам жатқызылды, соның алтауы – кәмелетке толмағандар.
Қазіргі кезде осы оқиға бойынша ҚР ҚК 345-бабы 4-бөлігіне сәйкес сотқа дейінгі тергеу амалдары жүргізілуде.
Еске сала кетейік, бұдан бұрын Батыс Қазақстанда автокөлік аударылып, 31 жастағы жолаушының мерт болғанын, Оралда жүргізуші құқығынан айырылған адам тағы да мас күйінде жол апатын жасағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).