ОРАЛ. ҚазАқпарат – Батыс Қазақстан облысына «Pfizer» компаниясы өндірген 29 250 доза «Комирнати» вакцинасы жеткізілді. Бұл туралы БҚО денсаулық сақтау басқармасы басшысының орынбасары Гүлнәр Әбдірахманова өңірлік коммуникациялар қызметі алаңында өткен брифингіде мәлім етті, деп хабарлайды ҚазАқпарат тілшісі.
Оның айтуынша, қазіргі кезде вакцина емханаларға таратылуда.
«Ертеңнен бастап жасөспірімдер, сондай-ақ жүкті және бала емізетін әйелдер егіледі. Бастапқыда 16-дан 18 жасқа дейінгі жасөспірімдер екпе алады. Содан кейін 15, 14, 13 және 12
жастағы балаларға кезек келеді», деді Г.Әбдірахманова.
БҚО санитарлық-эпидемиологиялық бақылау департаменті басшысының орынбасары Нұрлыбек Мұстаевтың сөзіне қарағанда, өңірде осы екпеге қатысты облыс әкімінің
орынбасары төрағалық ететін жұмыс тобы құрылды. Оның құрамына облыстық санитарлық-эпидемиологиялық бақылау департаменті, білім және денсаулық сақтау басқармаларының басшылары кірді. Қазіргі кезде егілетін контингент саны нақтылануда.
Еске сала кетейік, бұдан бұрын БҚО-да 244 мыңнан астам адамның коронавирусқа қарсы екпе алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).