«Батыс» өңірлік қолбасшылығының баспасөз қызметінен түскен мәліметке қарағанда, барлық бөлімдерде сайлау заңға сәйкес өткізілді. Оралда 5517-әскери бөлімде орналасқан №479 сайлау учаскесінде алғашқылардың бірі болып «Батыс» өңірлік қолбасшысы, генерал-майор Қайрат Ақтанов дауыс берді. «Бүгін - тарихи күн. Елдің болашағы осы сайлауға байланысты. Сондықтан Қазақстан азаматы ретінде өз борышымды орындап, азаматтық ұстанымымды білдірдім», деді Қ.Ақтанов. 6656-әскери бөлім командирінің тәрбие және әлеуметтік-құқықтық жұмыстар жөніндегі орынбасары, учаскелік сайлау комиссиясының төрағасы, майор Дулат Имановтың айтуынша, әскери қызметкерлер белсенділіктерінің жоғары екендігін көрсете білді. Туған күндері сайлаумен тұспа-тұс келген бес жауынгер ұмыт қалмай, оларға сыйлықтар табыс етілді. Сондай-ақ алғашқы болып өз таңдауын жасағандар да ұмыт қалған жоқ.
Сайлау комиссияларында заңбұзушылықтардың болмағандығын байқаушылар да атап өтті.
Сонымен, сағат 11.00-ге дейін «Батыс» өңірлік қолбасшылығының жеке құрамы түгелдей дауыс берді. Әскери бөлімдердегі барлығы бес жабық сайлау учаскесінде 5 мыңнан астам адам өз таңдауын жасады.