ОРАЛ. ҚазАқпарат - Кеше Батыс Қазақстан облысының әкімі Нұрлан Ноғаев өңірдің қоғамдық-саяси өміріне белсене араласып, мемлекеттік бағдарламалардың жүзеге асуына сүбелі үлес қосқаны үшін батысқазақстандық үш депутатқа ҚР Парламенті Сенатының Құрмет грамоталарын табыс етті.
Марапат өңірге танымал кәсіпкер, облыстық мәслихаттың депутаты Ақсерік Әйтімовке, сондай-ақ Жаңақала аудандық мәслихатының депутаты Рухолла Саматов пен Сырым аудандық мәслихатының хатшысы Әнуарбек Ғалымовқа берілді. Олардың қай-қайсысы да ұзақ жылдар бойы халық қалаулысы ретінде елге қызмет етіп келеді.
Айта кетейік, «ҚазИИТУ» ғылым-білім кешенінің құрылтайшысы, техника ғылымдарының кандидаты, профессор Ақсерік Әйтімов оған қоса 24 желтоқсан күні «Зеленов ауданының құрметті азаматы» атанды. Өңірдің өркендеуіне атсалысып келе жатқан А.Әйтімов осы ауданның түлегі ретінде түрлі шараларды қолдап, демеушілік танытып отырады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).