Батысқазақстандық дзюдошылар халықаралық турнирде чемпион атанды
16:17, 09 Қазан 2017
ОРАЛ. ҚазАқпарат - Батысқазақстандық спортшылар Қызылорда қаласында 1998-1999 жылғылар арасында дзюдодан қоғам қайраткері, Қармақшы ауданының құрметті азаматы Болатбек Сүлейменовті еске алуға арналған халықаралық турнирде сәтті өнер көрсетті, деп хабарлайды «ҚазАқпарат» тілшісі.
БҚО дене шынықтыру және спорт басқармасынан түскен мәліметке қарағанда, аталмыш жарысқа Қазақстан өңірлері мен Өзбекстан, Қырғызстан елдерінен екі жүздей татами шебері қатысып, 16 салмақ дәрежесі бойынша сынға түсті. Бұл ҚР спорт шебері нормативін орындау үшін балл есептелетін рейтингілік турнир еді.
Жарыс қорытындысында Батыс Қазақстан облысынан барған Тоқтар Үмітәлиев 60 кг салмақта жеңімпаз атанды. 73 кг салмақта Сайт Сейтқалиев чемпион болса, тағы бір батысқазақстандық Аңсарбек Ғайнуллин үшінші орынға көтерілді.