Батысқазақстандық мемлекеттік мекемелер басшылары «Өзіңнен баста» іс-шарасын жалғастыруда
18:59, 22 Маусым 2010
ОРАЛ. Маусымның 22-сі. ҚазАқпарат /Елжан Ералы/ - «Нұр Отан» ХДП мен ҚР Экономикалық қылмысқа және сыбайлас жемқорлыққа қарсы күрес агенттігі бірлесіп қолға алған «Сенің жемқорлыққа қарсылығың маңызды!» атты іс-шара барысында батысқазақстандық мемлекеттік мекемелер басшылары өз табыстарын жариялауды жалғастыруда,
деп хабарлайды ҚазАқпарат тілшісі.
«Өзінен бастағандардың» бірі, БҚО тілдерді дамыту басқармасының бастығы Махамбет Ихсанғалидың мәлімдеуінше, оның үш бөлмелі қызметтік пәтері бар. Айлық жалақысы - 143 мың теңге. Басқа жылжымайтын мүлкі жоқ.
БҚО статистика департаментінің бастығы Абай Хамзиннің төрт бөлмелі үйі, саяжайы бар. Айлық жалақысы - 145 мың теңге. Осы департамент бастығының орынбасары Болтай Әлімбаеваның екі бөлмелі пәтері бар, жалақысы - 130 мың теңге. Тағы бір орынбасар Аманжан Жұмановтың та «көрсеткіші» дәл осындай.