ОРАЛ. ҚазАқпарат - Ақсай қаласындағы «Назерке» үлгілі би ансамблі Алматы қаласында өткен балалар мен жасөспірімдер арасындағы «Сырым бар жүрегімде» атты республикалық байқаудың бас жүлдесін иеленді, деп хабарлайды «ҚазАқпарат» ХАА тілшісі.
Өнердің бірнеше түрінен өтетін дәстүрлі байқауда республика өңірлерінен барған жас дарындар жас ерекшеліктеріне қарай бақ сынады. Батыс Қазақстан облысы атынан сынға түскен, Айнұр Мұқанғалиева жетекшілік ететін «Назерке» ансамблі 9-10 жастағы қыздар арасында қазіргі заманғы биді әдемі орындап, бас жүлдені жеңіп алды. Оған қоса ансамбль 10-12 жастағылар арасында бірінші орынды еншіледі. Ал «Назеркенің» бишісі Алина Каюбалиева 9-10 жастағылар арасында жекелей сында екінші орынға көтерілді.
Айнұр Мұқанғалиеваның айтуынша, өзі талапты балаларға би үйретумен 25 жылдан бері айналысып келеді. Ал «Назерке» ансамбліне 20 жыл толды. Бұл жолы Алматыға 9-10 жастағы 4-сынып оқушылары барды. Олардың бимен айналысқанына төрт жылдай уақыт болды.
«Назерке» би ансамблі бұдан бұрын да көптеген халықаралық, республикалық байқаулардан жүлдемен оралып жүр», деді «ҚазАқпарат» тілшісіне Бөрлі аудандық демалу орталығының директоры Абдул Рахметов.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).