ОРАЛ. ҚазАқпарат - Батысқазақстандық оқушылар Ақтау қаласында гуманитарлық пәндер бойынша өткен республикалық пәндік олимпиададан жүлдемен оралды, деп хабарлайды «ҚазАқпарат» тілшісі.
Дарынды балаларға арналған мамандандырылған С.Сейфуллин атындағы №11 облыстық мектеп-интернаты кешенінен түскен мәліметке қарағанда, осы білім ордасынан барған 11-сынып оқушылары Раушан Сапар мен Айнұр Наукенова қазақ тілі мен әдебиетінен сәйкесінше екінші және үшінші орынды еншіледі. Олардың екеуінің де ұстазы - Динара Имашева. Сондай-ақ Аружан Абдолова ағылшын тілінен, Перизат Ғұмарова құқықтан алғысхатқа ие болды.
Сонымен қатар облыстық дарынды балаларға арналған мамандандырылған мектеп-интернатының шәкірттері де құр қайтқан жоқ. Мектеп директорының бағдарлы пәндер жөніндегі орынбасары Айгүл Кенжеғалиеваның мәлім еткеніндей, 11-сынып оқушылары Лара Болатова (жетекшісі Айнұр Шадығалиева) екінші, Ақмарал Әубәкірова (ұстазы Азат Жексенов) үшінші орынға көтерілді.
Айта кетейік, бұл қос мектеп ҰБТ-да жыл сайын жоғары көрсеткіштерге қол жеткізіп келеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).