ОРАЛ. ҚазАқпарат - Батысқазақстандық палуан Екатерина Ларионова Дохада өтіп жатқан Азия чемпионатында қола жүлдегер атанды.
Ол 63 келі салмақта солтүстіккореялық қарсыласын 7:2 есебімен ұтты.
Айта кетейік, кішкентайынан әкесі Алексей жаттықтырып келе жатқан Е.Ларионова 2011 жылы кадеттер арасында Азия, әлем біріншіліктерінде топ жарған болатын. 2013 жылы ересектер сапында да өнер көрсеткен Екатерина Будапешт қаласында өткен әлем чемпионатының қола жүлдесін жеңіп алды. 2014 жылы жастар арасында Азия біріншілігінің жеңімпазы атанған ол биыл Минск қаласында үш мәрте Олимпиада чемпионы Александр Медведьтің жүлдесі үшін ересектер арасында халықаралық Гран-при турнирінде күміс жүлдені еншілеген еді. Екатерина қызымыз - Рио-де-Жанейрода 2016 жылы өтетін Олимпиадаға барудан басты үміткерлердің бірі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).