ОРАЛ. 16 қараша. ҚазАқпарат /Елжан Ералы/ - Литваның Вильнюс қаласында өткен самбодан әлем чемпионатында батысқазақстандық саңлақ Ерболат Байбатыров топ жарды.
Ерболат бұл жолы 57 келі салмақта әлем чемпионы атанды. Бұрын 52 келі салмақта үздік шығып жүрген жиырма бес жастағы батысқазақстандық самбошы осымен төртінші рет әлем біріншілігінің жеңімпазы атанып отыр. Қазақстанда самбодан мұндай атақ-дәрежеге бұрын-соңды ешкім жеткен емес.
Е.Байбатыровты Қазақстанның еңбек сіңірген жаттықтырушылары, облыстық туризм, дене шынықтыру және спорт басқармасының бастығы Мүсілім Оңдағанов, Райбек Меңдіғалиев, Керей Қойшыбек сынды білікті мамандар жаттықтырып келеді.
Аталмыш чемпионатта 52 келі салмақта тағы бір батысқазақстандық оғылан Медет Оңдағанов күміс жүлдегер атанса, Бауыржан Ғұмаров әскери самбодан қола медальды еншіледі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).