ОРАЛ. ҚазАқпарат - Батысқазақстандық шахматшы Жанат Сайын биыл күзде Италияда жастар арасында өтетін әлем біріншілігіне жолдама алды, деп хабарлайды «ҚазАқпарат» ХАА тілшісі.
БҚО дене шынықтыру және спорт басқармасынан түскен мәліметке қарағанда, Жанат жуырда Астана қаласында 20 жасқа дейінгілер арасында өткен ел чемпионатында классикалық шахматтан жеңімпаз атанды. Барлығы 14 команда құрамында 61 шахматшы қатысқан додада тағы бір батысқазақстандық Айсезім Мұхит блицтен екінші орынды иеленді. Олардың екеуі де - Орал қаласындағы №2 балалар-жасөспірімдер спорт мектебінің шәкірттері.
Жаттықтырушы Валерий Миннің айтуынша, енді Жанат Сайын дүниежүзілік додаға дайындалатын болады.
Айта кетейік, Жанат Сайын 2015 жылы Таиландтың Паттайя қаласында 17 жасқа дейінгі жасөспірімдер (оқушылар) арасындағы шахматтан әлем чемпионатында абсолютті жеңімпаз атанған еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).