ОРАЛ. ҚазАқпарат - БҚО Ішкі істер департаментінің қызметкері Темірлан Ихсанғалиев ҚР ішкі істер органдары құрылуының 25 жылдығына орай Ақмола облысы Щучинск қаласында ерлер мен әйелдер арасында қоян-қолтық ұрыстан өткен оныншы ашық турнирде жеңімпаз атанды, деп хабарлайды «ҚазАқпарат» тілшісі.
Облыстық ІІД баспасөз қызметінен түскен мәліметке қарағанда, аталмыш жарысқа еліміздегі құқық қорғау органдары ғана емес, сондай-ақ бірқатар ТМД (Ресей, Беларусь, Қырғызстан, т.б.) елдерінен 18 команда құрамында 186 спортшы қатысып, бақ сынады.
Қазақстан құрамасы сапында сынға түскен Темірлан Ихсанғалиев 80 кг салмақта чемпиондық тұғырға көтерілді.
Айта кетейік, қоян-қолтық ұрыстан және әскери самбодан халықаралық дәрежедегі спорт шебері Темірлан Ихсанғалиев - талай халықаралық додада олжа салып жүрген белгілі спортшы. Ол - қоян-қолтық ұрыстан әлем кубогының жүлдегері, әскери самбодан екі дүркін әлем кубогы кезеңінің жеңімпазы, әлем біріншілігінің күміс жүлдегері.
Батыс Қазақстан. ҚазАқпарат.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).