ОРАЛ. ҚазАқпарат - Батысқазақстандық таеквондошылар Алматы облысы Қаскелең ауданында Қарасай батырды еске алуға арналған балалар, жасөспірімдер және жеткіншектер арасында ХІІ республикалық турнирден жеңіспен оралды, деп хабарлайды «ҚазАқпарат» ХАА тілшісі.
Таеквондодан БҚО құрамасының аға жаттықтырушысы Арслан Ордабаев бастап барған спортшылар арасынан Лиана Кушкеева мен Әділ Амангелдиев турнир чемпионы атанса, Ян Черенцов қола жүлдені иеленді. Бұл жарысқа Астана, Алматы қалалары мен республика облыстарынан балғын таеквондошылар қатысып, жас ерекшеліктеріне қарай бақ сынады. Турнир WTF - Бүкіләлемдік таеквондо федерациясының ережелеріне және шарттарына сәйкес, олимпиадалық жүйемен өткізілді.
Спортқа дарынды балаларға арналған мамандандырылған облыстық мектеп-интернатының әдіскері Гүлдария Сисенованың айтуынша, Лиана осы білім ордасының 7-сыныбында оқиды.
Жалпы, аталмыш мектептің шәкірттері басқа жарыстардан да олжалы оралып жүр. Айталық, Қостанай қаласында еркін күрестен Қазақстанның және КСРО-ның еңбек сіңірген жаттықтырушысы Петр Матущакты еске алуға арналған ХІІ республикалық турнирде Зейнеп Баянова мен Дана Сағыналиева күміс, Эльвира Құттыбай, Сәбит Түгелтаев, Арина Асмамбетова қола жүлдені иеленді. Оларды Мұсабек Нарегеев, Дулат Самиев, Гүлжанат Қожағалиева жаттықтырады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).