ОРАЛ. 15 желтоқсан. ҚазАқпарат - Кеше, 14 желтоқсан күні Тәуелсіздік мерекесіне орай Жәңгір хан атындағы Батыс Қазақстан аграрлық-техникалық университеті Оралдағы балалар үйлерінде «Еліміздің болашағы - жастар» атты қайырымдылық шарасын ұйымдастырды.
Университеттен Айнұр Базарованың хабарлағанындай, шараның басты мақсаты - түрлі себептермен ата-анасыз қалып, балалар үйінде тәрбиеленіп жатқан балдырғандарды қамқорлау, олардың алақан жылуын сезініп, ештеңеден тайсалмай, толыққанды азамат болып өсуіне жағдай жасау.
Алғаш облыстық балалар үйіне ат басын бұрған университет ұжымы балапандарға сыйлықтар үлестіріп, ерекше көңіл-күйге бөлеп қайтты. Кейін жетім балалар және ата-анасының қамқорлығынсыз қалған балаларға арналған №15 облыстық көмекші мектеп-интернатының тәрбиеленушілеріне де сыйлықтарын үлестіріп, тәрбиешілердің алғыстарына бөленсе, облыстық мамандандырылған «Мейірім» балалар үйінде де сәбилерге қажетті заттар таратылды.
Жалпы сомасы 500 мың теңгеге сәбилер тамағы, ойыншықтар, жеміс-жидектер, кондитерлік өнімдер, кішкене бөбектерге алғашқы қажетті заттар алынды.
Университеттің өнерпаз ұжымы дайындаған концерттік бағдарлама қойылып, бүлдіршіндердің ықыласына бөленді.
Аталған шара алдағы уақытта та өз жалғасын табатын болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).