ОРАЛ. 25 сәуір. ҚазАқпарат - 25 сәуір күні Жәңгір хан атындағы Батыс Қазақстан аграрлық-техникалық университетінде «Жігіт сұлтаны» байқауы мәреге жетті.
Байқау «Таныстырсам өзімді», «Сегіз қырлы, бір сырлы», «Ескірмейтін есті сөз», «Кім жылдам?» атты сайыстардан тұрды.
Барлық сыннан сүрінбей өтіп, бас жүлдені жеңіп алған политехникалық факультет намысын қорғаған Райымбек Мұқашевтің иығына «Жігіт сұлтаны - 2013» лентасы тағылып, қанатын қияға қомдап тұрған қыран мүсіні табыс етілді. Экономика және бизнес факультетінің студенті Ерлан Қажымұратов - бірінші, агрономия факультетінен Темірлан Ғаббасов - екінші, Ернар Айғалиев үшінші орынды еншіледі. Машина жасау факультетінен Мереке Есениязов пен Рустам Өзбеков арнайы аталымдармен марапатталды. Барлық қатысушылар дипломдар мен бағалы сыйлықтарға ие болды.
Аталмыш шара алдағы жылы да жалғасын таппақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).