ОРАЛ. 10 қазан. ҚазАқпарат - Батысқазақстандық үш ұстаз Алматы қаласынан «Үздік педагог-2012» республикалық байқауынан олжалы оралды.
Соның бірі, дарынды балаларға арналған С.Сейфуллин атындағы №11 облыстық мектеп-интернаты кешені қазақ тілі мен әдебиеті пәнінің мұғалімі Аянбек Мыңбаевтың айтуынша, тұңғыш рет ұйымдастырылған аталмыш байқауға еліміз бойынша 4 мың мұғалім қатысып, соның 48-і жүлдегер атанған. Бұл ретте олардың соңғы бес жылдағы барлық жетістіктері ескерілген.
Батыс Қазақстан облысынан бақ сынаған 30 ұстаздың 8-і облыстық деңгейде озық шыққан болатын. Соның үшеуі республикалық деңгейге өтіп, үздік атанды. Атап айтқанда, А.Мыңбаевпен бірге Ақжайық ауданы Қ.Байсиықов атындағы орта мектептің орыс кластарындағы қазақ тілі мен әдебиеті пәнінің мұғалімі Бағдагүл Ізбасарова, Орал мұнай, газ және салалық технологиялар колледжі информатика пәнінің оқытушысы Гүлжиян Жүсіпқалиеваға куәлік, медальға қоса 1,6 млн. астам теңге ақшалай сыйлық берілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).