Жеті адамнан тұратын БҚО делегациясын бастап барған облыстық жастар саясаты мәселелері жөніндегі басқарма басшысы Азамат Айтуевтің хабарлауынша, батысқазақстандық және ресейлік жастар ең алдымен агроөнеркәсіп кешені саласындағы ынтымақтастық мәселелерін, сондай-ақ өзара тиімді қарым-қатынас орнату жолдарын талқылады. Әсіресе, ауыл шаруашылығында жастар кәсіпкерлігін дамыту, жаңа технологияларды енгізу, азық-түлік қауіпсіздігін қамтамасыз ету мәселесі сөз болды. 14 қыркүйек күні басталған жастар форумы аясында батысқазақстандықтар барлық секциялық отырыстарға, шеберлік сағаттарына қатысып, ұсыныс-пікірлерімен бөлісті. 15 қыркүйек күні пленарлық мәжілісте екі ел министрліктерінің, Еуразия экономикалық комиссиясының өкілдері өз ой-толғамдарын ортаға салды. Сондай-ақ жас ғалымдар агроөнеркәсіп кешені мен азық-түлік қауіпсіздігінен басқа ауыл жастарының өзекті мәселелері жөнінде тәжірибе алмасты.
Ең бастысы, екі ел жастары бірлескен идея-жобаларды жүзеге асыру бағытында тағы бір қадам жасады. Мұндай байланыс алдағы уақытта да жалғасын табатын болады.