ОРАЛ. ҚазАқпарат - Атырау қаласында дзюдо күресінен 23 жасқа дейінгі жастар арасында өткен Қазақстан чемпионатында БҚО құрамасы сәтті өнер көрсетті, деп хабарлайды «ҚазАқпарат» тілшісі.
БҚО дене шынықтыру және спорт басқармасынан түскен мәліметке қарағанда, әсіресе, Темірлан Көлбай аса ауыр салмақта тамаша күресіп, чемпион атанды. Оған қоса Аңсарбек Ғайнуллин 73 келіде күміс, Саят Сейітқалиев 66 келіде қола жүлдеге ие болды.
Темірлан - дзюдо ғана емес, қазақ күресінен де түрлі жарыстарда олжа салып жүрген палуан.
Айта кетейік, осы күндері Ақтөбе қаласында өтіп жатқан «Ақ бидай» VІ республикалық ауыл спорты ойындарында батысқазақстандық тағы бір спортшы Нармағамбет Иманғазыұлы аударыспақтан 60 келі салмақта екінші орынға көтеріліп, күміс медальді жеңіп алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).