Баянауыл ұлттық паркіндегі өрт ауыздықталды

ПАВЛОДАР. KAZINFORM — Өрт сөндірушілер қазіргі уақытта жекелеген жалын ошақтарын жоюмен шұғылданып жатыр. Аумақта жауған жаңбыр да тілсіз жауды жедел еңсеруге себеп болған.

Баянауыл ұлттық паркінің Жасыбай орманшылығында шыққан өрт ауыздықталды. Бұл ақпаратты Баянауыл ауданының әкімдігі растады.

— Адам күштері мен құралдары ұлттық парк аумағындағы негізгі өрт ошақтарын сөндірді. Аудандық төтенше жағдайлар басқармасының мәліметінше, тек кейбір жерлерде бықсып жанып жатқан жерлер әлі де сақталып отыр. Оқиға орнында кезекші өрт сөндірушілер түні бойы жағдайды бақылаумен болады. Ал таңертең тың күш тағы жұмылдырылып, өртті толығымен жою жоспарланып отыр. Қазір аудан аумағында жаңбыр жауып тұр. Бұл жағдай табиғи апаттың тез арада ауыздықтауға өз септігін тигізген, - деп хабарлады аудан әкімдігінің баспасөз қызметінен.

Еске сала кетейік, бүгін Баянауылда ұлттық паркке қарасты жерлер өртенді. 

Төтенше жағдайлар министрлігі Баянауылдағы елді мекендерге қауіп жоқ екенін мәлімдеді. 

Бұған қоса Баянауылда өртеніп жатқан үйлер кімге тиесілі екенін анықтап жазған едік.

Баянауыл ұлттық паркіне жыл сайын 120 мыңнан астам турист келеді.