Баянауылда өртеніп жатқан үйлер кімге тиесілі

ПАВЛОДАР. KAZINFORM - Баянауыл ауданының әкімдігі Жасыбай орманшылығындағы өрттен зардап шегіп жатқан ғимараттарда адам тұрмайтынын хабарлады.

Бұған дейін жергілікті тұрғындар түсірген бейнежазбалардан Жасыбай орманшылығындағы ғимараттардың өртеніп жатқанын көруге болатынын жазғанбыз. 

Бұл нысандардың кімге тиесілі екенін анықтап көрдік. Аудан әкімдігінің хабарлауынша, жанып жатқан қос ғимаратта адам тұрмайды.

- Бейнежазбада жанып жатқаны түсірілген ғимараттар бұрын қолданыста болған ескі үйлер, қазір адам тұрмайды. Жасыбай демалыс аймағына кіреберісте орналасқан. Үйлер жеке адамға тиесілі, бірақ иесі белгісіз. Қос ғимарат та бір аумақта орналасқаны себепті, екеуінің де иесі біреу болуы мүмкін деп ойлаймыз, - деп мәлімдеді Баянауыл ауданы әкімдігінен.

Еске сала кетейік, Баянауылда ұлттық паркке қарасты жерлер өртеніп жатыр. 

Төтенше жағдайлар министрлігі Баянауылдағы елді мекендерге қауіп жоқ екенін мәлімдеді. 

Өртеніп жатқан Баянауыл ұлттық паркіне жыл сайын 120 мыңнан астам турист келеді.