Баянауылдағы жол апатында тірі қалған 3 жасар бала Екібастұз ауруханасына жатқызылды
ПАВЛОДАР. KAZINFORM — «Қалқаман-Керней» автожолындағы қайғылы жол апатында тірі қалған үш жасар ер бала түрлі жарақатпен, жабық бас-ми жарақатымен және ми шайқалуы белгілерімен Екібастұз ауруханасына жеткізілді.
Бұл туралы өңірлік жедел жәрдем стансасының баспасөз қызметінен хабарлады.
— 103 пультіне жол апаты туралы қоңырау 19 сәуір күні сағат 21:13–те келіп түсті. Баянауыл тас жолында, Бірлік ауылы маңында екі жеңіл автокөлік соқтығысқан. Шақыртуға Майқайың кентінен жедел жәрдем бригадасы жіберілді. Оқиға орнында төрт адамның қаза тапқаны анықталды. Атап айтқанда, 1998 және 1999 жылы туған екі ер адам, 23 жастағы қыз және алты айлық сәби. 2022 жылы туған тағы бір ұл бала көптеген жарақатпен, жабық бас-ми жарақатымен және ми шайқалу белгілерімен алдымен Майқайың ауылдық учаскелік ауруханасына, кейін Екібастұз қалалық ауруханасына жеткізілді, — деп мәлімдеді жедел жәрдем стансасынан.
Еске сала кетейік, бұған дейін Павлодар облысында жол апатынан 4 адам қаза тапқаны туралы жазғанбыз.