ҚЫЗЫЛОРДА. ҚазАқпарат - Байқоңыр қалалық сотында анасынан ақша алу үшін оны пышақпен қорқытқан жігітке қатысты қылмыстық іс қаралды, деп хабарлайды ҚазАқпарат тілшісі.
Қазақстан Республикасы Қылмыстық кодексінің 115-бабымен сотталушы Б.-ға қатысты қылмыстық іс бұйрықтық іс жүргізу тәртібімен жүргізілді. Байқоңыр қалалық сотының мәліметіне сүйенсек, оқиға барысы былай өрбіген. Б. есімді азамат Байқоңыр қаласындағы Абай даңғылы бойында орналасқан пәтерде жанжал шығарған. Жанжал барысында айыпталушы асхана пышағымен ақша бермегені үшін анасын «өлтіремін, пышақтаймын» деп қорқытады.
«Аталған іс әрекеті арқылы азамат Б. ҚР ҚК-нің 115-бабына сай заңға қайшы әрекет жасаған», - деп хабарлайды Байқоңыр қалалық сотының баспасөз қызметі.
Сот сотталушы Б.-ны Қазақстан Республикасы Қылмыстық кодексінің 115-бабымен кінәлі деп танып, 20 айлық есептік көрсеткіш мөлшерінде (48100 теңге) айыппұл салуға үкім етті.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.