НҰР-СҰЛТАН. ҚазАқпарат – COVID-19 инфекциясын жұқтыру дерегінің өсуіне байланысты Бельгия билігі иммунитеті әлсіз тұрғындарды қауіпті дерттен сақтану мақсатында вакцина салдыруға шақырды, деп хабарлайды ҚазАқпараттың меншікті тілшісі.
Бельгия мамандары денсаулығы осал топқа жататын тұрғындар коронавирусқа қарсы вакцинаның төртінші дозасын алуы керек деп санайды. Қазір елде COVID-19-бен ауру көбейіп барады. Сонымен бірге, BA.4 және BA.5 омикрон-штамына шалдығу басым.
Еуропа аурудың алдын алу және бақылау орталығы (ECDC) осы аптада бүкіл Еуропалық Одақта BA.4 және BA.5 нұсқалары өрши түсетінін, бұл науқастар санының күрт өсуіне әкелуі мүмкіндігін ескерткен болатын.
Оксфорд университетінің пандемияны бақылаумен айналысатын «Біздің әлем деректерде» жобасының (OWID) мәліметтеріне сәйкес, коронавирус жұқтыру жағдайлары бірқатар елде өсіп барады. Соның ішінде, Португалия, Германия, Франция, Греция, Австрия, Италия, Швейцария және Испанияда.
Гүлнұр Ғазизқызы
Әл-Фараби атындағы ҚазҰУ журналистика факультетінің түлегі. Еңбек жолын «Қазақ әдебиеті», «Сақшы» газеттерінен бастаған. «Дала мен Қала» республикалық қоғамдық-саяси апталығында тілші, жауапты хатшы болып істеді. «Қазақстан-Ақтау» телеарнасының тілшісі, «Қазақстан» Ұлттық арнасының Маңғыстау облысындағы меншікті тілшісі, Маңғыстау облысы әкімі баспасөз қызметінің бас маманы, «Қазақстан» РТРК» АҚ Маңғыстау облыстық филиалы директорының орынбасары – бас редакторы болды.
Ақпарат саласының үздігі.
«ҚР Президенті телерадиокешенінде» 2022 жылғы 1 сәуірден бастап істейді. Kazinform халықаралық ақпарат агенттігі басқарушы директорының орынбасары – қазақ редакциясының бас редакторы.