Бес мемлекет Газадағы тұрақтандыру күштеріне әскер жібереді

АСТАНА. KAZINFORM — Газадағы Халықаралық тұрақтандыру күштерін (ISF) басқарушы генерал-майор Джаспер Джефферс 19 ақпан, бейсенбі күні бес мемлекет өз әскерін жаңа қауіпсіздік құрылымына бағыттайтынын хабарлады, деп жазады Анадолы.

Джефферс Вашингтондағы Бейбітшілік кеңесінің алғашқы отырысында сөйлеп, Индонезия, Марокко, Қазақстан, Косово және Албания әскер жіберетінін, ал Мысыр мен Иордания полиция күштерін оқытатынын айтты.

Сонымен қатар, Индонезия күштердің орынбасары қызметін атқаратыны жарияланды.

— Бұл алғашқы қадамдар арқылы біз Газадағы қауіпсіздікті қамтамасыз етіп, болашақтағы өркендеу мен тұрақты бейбітшілікке жол ашамыз, — деді генерал.

Еске салсақ, Президент Қасым-Жомарт Тоқаев Бейбітшілік кеңесінің алғашқы отырысына қатысып, сөз сөйледі. 

Президент еліміз Газа секторындағы ахуалды тұрақтандырып, аймақты қалпына келтіру жұмыстарына атсалысуға дайын екенін жеткізді. 

Сондай-ақ, Бейбітшілік кеңесі барысында Газаның дамуы мен инфрақұрылымын қалпына келтіру жоспары таныстырылды.