«Шанхай ынтымақтастық ұйымы шеңберіндегі ынтымақтастық Қазақстанның көп векторлы саясатының маңызды элементі болып табылады. Әрі ұлттық және өңірлік қауіпсіздікті қамтамасыз ету ісіне үлкен үлес қосады. Қазақстан ШЫҰ-ның өзара сенімді нығайту, достық пен тату көршілік, көп салалы ынтымақтастықты дамыту, сондай-ақ бой көрсеткен лаңкестік, сепаратистік және экстремистік әрекеттерге бірлесіп қарсы тұра білу мақсаттарына жақын», - деп атап өтті генерал-майор Мұқан Дүйсекеев.
ШЫҰ форматындағы командалық-штабтық оқу-жаттығулары дәстүрлі түрде ұйымға мүше мемлекеттер аумағында екі жылда бір рет өткізіліп тұрады. Аталған іс-шараға Қазақстан, Қытай, Ресей, Тәжікстан және Қырғыз Республикасының әскери контингенттері қатысады.
Биыл «Бейбіт миссия - 2014» оқу-жаттығулары ҚХР аумағында өтеді. 2010 жылы «Бейбіт миссия» оқу-жаттығулары Қазақстанның Мәтібұлақ полигонында өткен болатын.