Қазақстандық, әлемнің 247-ракеткасы, 23 жастағы Бейбіт Жұқаев Шарлотсвилл (АҚШ) челленджер турнирінің финалына шықты, деп хабарлайды Kazinform.
Ақтау теннис мектебінің түлегі жартылай финалда дүниежүзілік рейтингте 254-орында тұрған, өзінен бір жас үлкен америкалық Патрик Кипсонмен шеберлік таластырды.
Б.Жұқаев матч басталысымен-ақ бірден брейк жасап, 2:0 есебімен алға кетті. Сол басымдықты уысынан шығарған жоқ – 6:4.
Екінші сетте Бейбіт тай-брейкте жеңісті жұлып алды – 7:6 (7:4).
Сағат жарымнан астам уақытқа созылған ойын барысында қазақстандық спортшы 18 эйс жасап, 4 брейк-пойнттың біреуін өз есебіне жазды.
Қарсыласы 10 эйспен шектелді.
Бейбіт Жұқаев соңғы бәсекеде қос америкалық, әлемнің 376-ракеткасы Айдан Mayo немесе рейтингте 458-сатыдағы Итан Куиннің біреуімен бас жүлдені сарапқа салады.
Еске сала кетейік, бұдан бұрын WTA қорытынды турнирінде Елена Рыбакинаның жартылай финалға шыға алмағанын жазған болатынбыз.
Жібек Құламбаева Тунистегі жарыстың жеңімпазы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).