АСТАНА. KAZINFORM – Қазақстандық теннисші, әлемнің 244-ракеткасы Бейбіт Жұқаев Оэйраш (Португалия) челленджер турнирінің ширек финалына шықты.
Қазақстандық спортшы екінші айналымда рейтингіде 253-орында тұрған литвалық Едас Бутвиласпен кездесті.
Бірінші партияда Бейбіт 7:5 есебімен басым түссе, екіншісінде литвалық теннисші есе қайырды – 6:4.
Үшінші, шешуші сетте Жұқаев дес бермеді – 6:1.
Бір сағат 49 минутқа созылған тартысты матчта Бейбіт 21 эйс жасап, 7 брейк-пойнттың төртеуін пайдаланды. Бутвилас 2 эйс, 2 брейктен аса алмады.
Бейбіт Жұқаев жартылай финалға шығу үшін әлемнің 109-ыншы, жарыстың 1-ракеткасы, америкалық Александр Ковачевич немесе рейтингіде 235-сатыдағы эстониялық Марк Лайалдың қай жеңгенімен таласады.
Б.Жұқаев қазіргі кезде ATP Live рейтингісінде 236-орынға көтеріліп тұр.
Тағы бір қазақстандық, әлемнің 249-ракеткасы Денис Евсеев осы додада рейтингіде 307-орындағы португалиялық Фредерику Феррейра Силваға жол берді – 4:6, 6:2, 1:6.
Еске сала кетейік, бұдан бұрын Бейбіт Жұқаевтың Португалиядағы жарысты сәтті бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).