НҰР-СҰЛТАН. ҚазАқпарат - Қытай астанасы Бейжің қаласында өтіп жатқан қысқы Олимпиада ойындарында қазақстандық 16 жастағы Анастасия Городко әйелдер арасында фристайл-могулдан лайықты нәтижеге қол жеткізді, деп хабарлайды ҚазАқпарат тілшісі.
Өзінің екінші іріктеу әрекетінде ол 67.47 балл жинады. Осылайша Олимпиаданың ең жас қатысушысы 11-орынға тұрақтады. Нәтижесінде дүбірлі доданың финалына шығуға қол созым жерде қалды.
Еске салсақ, еліміздің атынан Юлия Галышева финалда бақ сынауға мүмкіндік алды.
Ол Қазақстан құрамасынан жүлдеге басты үміткер саналады.
Ақ Олимпиадада еліміздің атынан 34 спортшы 87 жолдама бойынша сынға түседі. Мамандардың айтуынша, қазақстандық спортшылар фристайл-могул, фристайл-акробатика, шорт-тректе жүлде қорын толықтыруы мүмкін.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.