16:48, 29 Сәуір 2018

Бейжіңнің мәдениет фестивалінде студенттер Қазақстанды таныстырды

БЕЙЖІҢ. ҚазАқпарат - Қытайдағы Қазақстан студенттері қауымдастығының (KSAC) Бейжіңдегі бөлімшесінің белсенділері Халықаралық бизнес және экономика университетінде өткен мәдениет фестивалінде Қазақстанды таныстырды, деп хабарлайды «ҚазАқпарат» ХАА-ның Қытайдағы меншікті тілшісі.

Шара барысында қазақстандық 43 студент бауырсақ пісіріп, ет асып, тәтті дәмдер әзірледі. Сонымен қатар, белсенділер қазақы қолөнер бұйымдарын, Қазақстан туралы постерлерді келушілерге паш етті.

Студенттер ұлттық киіммен қара жорға биін билеп, «Балбырауын» күйін орындап, заманауи флешмоб көрсетті.
«Концерттік нөмірлерді Анель Құрманова, Салтанат Доспанова мен Азина Темірова ұйымдастырды. Реквизит жұмыстарын Дәулет Жақсыбек атқарды. Дәулетті дастархан үшін Томирис Махан бастаған қыздарға алғыс айтамыз. Әртүрлі ойындармен және байқаулармен біздің меймандардың көңіл-күйін Мәди Игібаева көтерді», - деді «ҚазАқпарат» ХАА тілшісіне сұхбат берген KSAC Бейжіңдегі бөлімшесінің төрағасы Нұрәлі Ырсалиев.

Оның айтуынша, KSAC қолға алатын келесі шара - Жеңіс мерекесі болмақ.

Қазақстанның сыртқы саясаты Қазақстанның халықаралық қызметі. Сыртқы саясат Қоғам
Аян Бекенұлы