қолданылғандығын растады.
«Ұлттық бірыңғай тестілеуді өткізу жұмысының әлсіреуіне жол берген Білім және ғылым министрлігінің барлық қызметкерелеріне қатысты әкімшілік жаза қолданылды. Ішкі істер министрлігіне де тиісті хат жолданды», - деп атап көрсетті бүгінгі баспасөз мәслихатында вице-министр Махметқали Сарыбеков.
Айта кетейік, бұған дейін министр Бақытжан Жұмағұлов Ұлттық бірыңғай тестілеуге қатысқан мектеп түлектерін іш киімге дейін шешіндіру оқиғасының тек Сәкен Сейфуллин атындағы Қазақ агротехникалық университетінде ғана болғандығын растаған еді. Осыған орай құрылған арнайы тексеріс комиссиясы сол жоғары оқу орнында тест тапсырған мектеп түлектерінің алғашқы легін тексеру кезінде Сарыарқа аудандық полиция қызметкерлерінің жұмыс бабында асыра әрекет еткені анықталды. Әрине, Білім және ғылым министрлігінің қызметкерлері ондай әрекеттің алдын алуға болатын еді. Бірақ олар полицияға ләм-мим деген де жоқ. Сондықтан арнайы комиссия Ұлттық бірыңғай тестілеу науқанына жауапты болған министрліктің кейбір лауазымды тұлғаларына қатысты тәртіптік жаза қолданыпты. Атап айтқанда, сол күні Сәкен Сейфуллин атындағы Қазақ агротехникалық университетінде Ұлттық бірыңғай тестілеуді өткізуді ұйымдастыру шараларын бақылау жұмысының әлсіреуіне байланысты вице-министр Мұрат Орынхановқа ескерту жасалып, Білім және ғылым саласындағы бақылау комитетінің төрағасы Серік Ырсалиев пен министрлікке қарасты Ұлттық бірыңғай тестілеу орталығының директоры Қали Әбдиевке сөгіс жарияланды. Ал сол кезде тиісті шара қолданбағаны үшін Қазақ агротехникалық университеті жанындағы Ұлттық бірыңғай тестілеу орталығы филиалының жетекшісі Мақсат Тоқышев қызметінен босатылды. Сондай-ақ ҚР Білім және ғылым министрлігі Ұлттық бірыңғай тестілеу кезінде түлектерді тексерген кейбір полицейлердің өз қызметін асыра пайдаланғаны туралы ресми хатты Ішкі істер министрлігіне жолдады.