Биатлоннан Қазақстан құрамасы допинг қолданды деп күдіктелуде

АСТАНА. ҚазАқпарат - Хохфильценде австриялық полиция биатлоннан Қазақстан құрамасы тұрып жатқан жерді тінтіп, көптеген медициналық құрылғылар мен тыйым салынған фармакологиялық дәрі-дәрмектер тапты.

Табылған заттар тәркіленіп, дерек бойынша тергеу жұмыстары басталды, деп хабарлайды ҚазАқпарат Sports.kz сайтына сілтеме жасап.

Табылған дәрілік заттар мен құралдар Австрияның ұлттық допингке қарсы агенттігіне (NADA Австрия) тапсырылды. Құжаттар мен қолмен жазылған қағаздарға жүргізілген сараптама негізінде, қораптар мен ондағы заттардың биатлоннан Қазақстанның ұлттық құрамасына тиесілі екендігін топшылауға болады.

Қазақстан биатлон федерациясының бас хатшысы Манас Үсеновтің айтуынша, Австрияның федералды полициясы осы елде табылған дәрі-дәрмектердің Қазақстанның биатлон құрамасына тиесілі екендігі тексеріліп жатқандығын хабарлаған. Қазіргі таңда олардың тыйым салынған дәрілер екендігін айту әзірге ерте.

«Австрия федералдық полициясы баспасөз мәслихатында мәлімдегендей, Антхольц маңында медициналық дәрі-дәрмектердің қалдықтары бар қораптар табылған. Дәл сол жерден Қазақстан құрамасы дәрігерінің аккредитациясы табылды. Кеше қонақ үйде біздің команданы тінтіді. Дәрігердің медициналық дәрі-дәрмектері тәркіленді. Бірақ, бізде барлық дәрі-дәрмектердің рұқсаты бар. Сондай-ақ, полиция қазіргі таңда табылған заттардың тексеріліп жатқандығын мәлімдеді. Олардың тыйым салынғандығы немесе жоқтығын, сараптама көрсетеді. Біздің команда допинг және ДНК тестін тапсырды. Енді сараптама нәтижесін күтудеміз. Австрияның допинг агенттігі қораптарда табылған дәрі-дәрмектердің сараптамасын алды. Қазіргі таңда нәтижесі туралы ақпаратты күтеміз», - деді ҚР Биатлон федерациясының бас хатшысы.