Биыл Павлодардағы қарбыз алқаптары 2 мың гектарға жуықтады

ПАВЛОДАР. KAZINFORM — Былтыр ауданда 1190 гектар жерге қарбыз егілсе, биыл бұл көрсеткіш 1910 гектарға жетіп отыр. Қазіргі таңда аудан бойынша 26 шаруа қожалық тәтті өнім өсірумен айналысады.

Павлодардың Аққулы ауданы тәтті қарбызымен танымал. Оның өнімдерін еліміздің көршілес аймақтары ғана емес, Ресей тұрғындары да тамсанып жейді.

Аққулы ауданының әкімі Руслан Мұқановтың айтуынша, соңғы жылдары қарбыз алқабы айтарлықтай ұлғайған. 

— Былтыр ауданда 1190 гектар жерге қарбыз егілсе, биыл бұл көрсеткіш 1910 гектарға жетіп отыр. Қазіргі бұл іспен аудан бойынша 26 шаруа қожалығы шұғылданып жатыр. Шарбақты, Ямышев және Қарақала ауылдарында қарбыздың 62 түрлі сұрпы жерсінген, — дейді аудан басшысы.

Қарбыз гектарынан 40-45 центнерден жиналып жатыр. Қазіргі уақытта өнімнің алғашқы партиясы Астана мен Қарағанды қалаларына да жөнелтілу үстінде.

Еске сала кетейік, Алматы облысында 309 тонна құлпынай мен 15 мың тоннадан астам қарбыз жиналды.