Биыл шаруаларға 700 млрд теңге жеңілдетілген кредит беріледі

АСТАНА. KAZINFORM – Биыл елімізде 8 млн га жерге егін егу жоспарланып отыр. Егін маусымаына дайындық жұмыстары туралы Ауыл шаруашылығы министрі Айдарбек Сапаров айтып берді.

— Көктемгі егіс жұмыстарына жеңілдетілген кредит көлемі 700 млрд теңге. Егіс науқанын қаржыландыру былтыр қараша айында басталды. Фермерлер субсидиясыз, таза 5%-бен жеңілдетілген кредиттер алып жатыр. Бүгінде 206 млрд теңгеге 1,8 мыңнан астам шаруашылық қаржыландырылды. Биыл кемінде 8 млн га егіс алқаптарын қамтуды жоспарлап отырмыз. Сондай-ақ, қарыз сомасының 85% кепілдік беру бағдарламасының іске асырылуы жалғасады. Сонымен қатар 200 млрд теңге сомасына жеңілдетілген лизингті ұйымдастыру отандық техникасының 6 мың бірлігін сатып алуға мүмкіндік береді, — деді Айдарбек Сапаров Үкімет отырысында. 

Оның айтуынша, қазір 3,2 мың шаруадан 130 млрд теңгеге 5 мың техниканы сатып алуға өтінім келіп түскен.

-– Көктемгі егіс жұмыстарын қаржыландыруға әлеуметтік кәсіпкерлік корпорациялардың қосылуы кредит берудің қолжетімділіктің маңызды факторы болды. Өткен жылы бұл бағдарламаға 7 әлеуметтік кәсіпкерлік корпорация қатысты, бірақ бүгінде тек 4 корпорация қатысып жатыр. Бұл жағдай шаруалардың арасында наразылық тудырып жатыр. Осыған байланысты, облыс әкімдіктеріне әлеуметтік кәсіпкерлік корпорация арқылы шаруаларды қаржыландыру жұмыстарын күшейту керек. Ауыл шаруашылығын қаржыландыруды кеңейту үшін қаржы институттарын тікелей субсидиялау енгізіледі. Биыл аграрлық несие корпорациясы арқылы 48 млрд теңге өңдеу кәсіпорындарын қолдау үшін айналым қаражатына беріледі, — дейді ол. 

Бұған дейін елімізде көлік инфрақұрылымын жаңғыртуға берілген қарызға мемлекеттік кепіл беретіні туралы хабарлаған едік.