Биыл жас ғалымдарға 140 баспана тегін беріледі

АСТАНА. KAZINFORM – Ғылым және жоғары білім министрі Саясат Нұрбек Үкімет отырысында жас ғалымдарды қолдау тетіктерін атады.

- Жас ғалымдарға арналған гранттық конкурстар арқылы 2000-нан астам зерттеуші 835 жобаны іске асыру мүмкіндігін алды. Жас ғалымдарға тұңғыш рет 351 пәтер берілді. Оның ішінде 61-і президентіміздің тікелей тапсырмасымен тегін берілді. Жалпы биыл 140 тегін пәтер беріледі, - деді ведомство басшысы.

Министрдің сөзінше, ғылыми дәрежелер мен атақтарға төленетін қосымша төлемдер артқан.

- Халықаралық тағылымдамалар жалғасуда. Енді «Үздік ғылыми қызметкер» сыйлығы, ғылым саласындағы мемлекеттік сыйлықтар және 50 талантты жас ғалымға стипендия бөлінеді, - деді Саясат Нұрбек.

Оның айтуынша, елдегі 25,5 мың ғалымның 54 пайызы — 40 жастан асқандар.