Билеті бар, бірақ орын жоқ: жолаушыларды тасымалдау ережесін бұзғандарға айыппұл салынады

АСТАНА. KAZINFORM — Қабылданған шаралар әуе компанияларының қызметін бақылауды күшейтіп, жолаушылардың құқықтарын қорғауға, билет нормасынан артық сатылым салдарынан ұшаққа отырғызудан бас тарту жағдайларын жоюға мүмкіндік береді. 

«Овербукинг» — әуе кемесіндегі орындар санынан артық билет сату тәжірибесі — көптеген елде жиі қолданылады. Ірі халықаралық әуе компаниялары кей жолаушылардың рейске келмейтінін болжап, орыннан артық билет сатады. Алайда барлық жолаушы ұшуға келген жағдайда, кейбіреуіне ұшаққа отыруға рұқсат берілмей жатады.

Соңғы екі жылда Қазақстанда да бұл тәжірибе кейбір әуе тасымалдаушылары тарапынан, әсіресе танымал бағыттарда, мереке және демалыс күндері қолданылған. Жолаушылар қолында сатып алған билеті бола тұра, ұшаққа отырғызылмай, балама жол іздеуге мәжбүр болған. Қоғам наразылығы артып, мәселені шұғыл шешу қажет болды.

Айта кету керек, билет болғанымен, борттағы орын берілмеген жағдайда жауапкершілік тек халықаралық рейстерге ғана қолданылатын.

Прокуратураның ұсынысы бойынша Парламент Мәжілісі Әкімшілік құқық бұзу туралы кодекске өзгерістер енгізу мәселесін қарап, жауапкершілікті ішкі рейстерге де қолдануды мақұлдады.

— Енді ішкі рейстерде жолаушыларды, багаж бен жүктерді тасымалдау ережелерін бұзғаны үшін әкімшілік жауапкершілік көзделген. Жаңа нормаға сәйкес, әуе тасымалдаушы 50 АЕК мөлшерінде айыппұл төлеуі мүмкін, — делінген Бас көлік прокуратурасы хабарламасында.

Айта кетелік Қазақстаннан қай елдерге тікелей әуе рейстері бар екені туралы жазған едік.