Білім саласына бөлінген қаржыдан қайтарым болуы тиіс - Н.Ноғаев, БҚО әкімі
Алдымен есеп берген облыстық білім басқармасының басшысы Айгүл Мыңбаеваның айтуынша, ҰБТ тапсырушылар саны соңғы үш жылда азайып келеді. Биыл түлектердің 69,2 пайызы сынақ тапсырмақшы. Мәселен, Ақжайық ауданында бұл көрсеткіш 5, Жаңақалада 15, Қаратөбеде 2 пайызға қысқарып кеткен. Бөрлі, Қазталов, Теректі, Шыңғырлау аудандары мен Орал қаласында да осындай жағдай орын алып отыр. Жәнібек ауданында ғана тапсырушылар саны өсті, демек, онда нақты жұмыс бар деген сөз.
Осыған байланысты түсінік берген Ақжайық ауданының әкімі Нариман Төреғалиев түлектер колледжге, Ресейдегі оқу орындарына кететіндіктен және әскерге шақырылатындықтан, ҰБТ-дан бас тартып жататынын жеткізді.
Өңір басшысы мұнымен түбегейлі келіспейтінін білдірді. «Бұл мәселені бетімен жіберуге болмайды. Түсінік жұмыстары оқу жылы аяқталуға таяу қалғанда емес, жыл бойы жүргізілуі тиіс. Білім саласында қандай өзгерістер енгізіліп жатқанын үнемі қадағалап, соған сәйкес шаралар алу қажет. Мәселен, бұрын колледжге түскен кезде ҰБТ тапсырмайтын болса, қазір жағдай өзгерді. Кейін ЖОО-ға түскен кезде қиындыққа тап болады. Сынақ тапсырудағы басқа да жаңалықтарды кейбір түлектер білмеуі мүмкін. Осының бәрін білім саласының басшылары, аудандар мен қала әкімдері күнбе-күн бақылап, тиісті шара алып, түлектерге ұғындырып отыруы тиіс», деді әкім.
Өкінішке қарай, кейбір жерлерде ҰБТ көрсеткіштерінің төмен болмауы үшін түлектерді оны тапсырмауға үгіттеушіліктің бар екені жасырын емес. Қысқаша айтқанда, ҰБТ барлық заң талаптарына сәйкес ұйымдастырылуы керек. Жыл сайын қаншама жаңа білім нысандары салынып, салаға қаншама қаржы бөлініп жатыр, егер оның қайтарымы болмаса, мұны жауапсыздық демей, қалай түсіндіруге болады. Ең бастысы, шәкірттердің сапалы білім, дұрыс тәрбие алып шығуы үшін жүктелетін жауапкершілік ортақ. Одан ешкім тысқары қала алмайды. Осыған орай Нұрлан Асқарұлы сала басшылары, қала, аудандар әкімдеріне нақты тапсырмалар беріп, оның орындалуы қажеттігін атап көрсетті.
Кеңесте түлектерден мұғалімге сыйлық алу үшін қаржы жинамау, мектеп бітірушілер кештерін өткізуде шашпашылдық пен даңғазалыққа салынбау керектігі де ескертілді.