АСТАНА. KAZINFORM – Қытайдың Шэньчжэнь қаласында теннистен Билли Джин Кинг кубогының ширек финалында Қазақстан мен АҚШ матчында қос құрама үздіктері кортқа шықты.
Елена Рыбакина әлемдік рейтингіде 10, ал оның америкалық қарсыласы Джессика Пегула 7-орында тұр.
Осыған дейін екі теннисші өзара төрт рет кездесіп, соның үшеуінде Пегула басым түскен еді.
Бұл жолы Рыбакина бірінші партияны брейкпен түйіндеді – 6:4. Елена екінші сетте де 3:0 есебімен алға кетті. Тағы бір брейк жасап, есепті 5:1-ге жеткізді. Содан кейін матчқа доп бергенде, мүмкіндігін жіберген жоқ – 6:1.
Бір сағат 11 минутқа созылған бәсекеде Е.Рыбакина 9 эйспен бірге 7 брейк-пойнттың төртеуін өз есебіне жазды. Пегула 1 брейкпен (4 брейк-пойнт) шектелді.
Енді матч тағдыры жұптық кездесуде шешіледі.
Еске сала кетейік, бұдан бұрын Билли Джин Кинг кубогында Қазақстанмен матчта АҚШ-тың алға шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).